「我哋係垃圾嚟㗎，唔好嘥氣啦！」
前年我被派去一間中學教心理學，
教之前，學校嘅訓導老師已通知我: 「我哋係band 3學校，好多學生係SEN，雙非唔太識廣東話，有家庭問題，你果班有45個學生，盡量簡單啲教就得㗎啦！」
嘩！聽完之後，覺得個情況仲嚴重過以前教PG，12個小朋友，一半係SEN，打開門有尖叫，有企咗喺枱，有瞓喺地下碌緊，有幾個爭緊玩具，然後家長企喺你身後睇你表演
如我所料，要教晒 「心理學六大學派及理論」係無可能，於是，我只希望喺呢段時間可以令呢班「大眾眼中有行為問題、讀唔成書」嘅學生有返目標同動力。
其實當認識咗佢哋之後，會發覺佢哋好可愛，亦有佢哋嘅長處。
有一堂我鼓勵佢哋俾心機考好DSE，問佢哋有咩計劃嘅時候，
有個男仔答我: 「Miss, 唔好嘥氣啦！我哋係垃圾嚟㗎咋，我只想快啲搵錢搬屋，唔洗我老豆成日醉酒打我！」
我: 「點會係垃圾？每個人一定有佢嘅優點同長處。」
其他同學: 「Miss, 個個都話我哋係垃圾㗎啦，好多老師都咁同我哋講，你無聽過咩？」
作為媽媽/老師，聽到呢啲說話真係好心痛。
我 (略帶激動): 「我唔理其他人點講，我見到嘅係一班好有活力，喺運動場/球場/創作/IT等等方面有潛質有能力有興趣嘅後生仔女，你哋喺我心目中一啲都唔垃圾，我喺你哋每個人身上都學到一啲嘢。我希望你哋努力去發夢，去追夢！」
當我講完之後，四十對眼呆望住我。果刻我諗，死啦，我係咪太老土，佢哋心中係咪暗笑緊我?
落堂嘅時候，有位女同學問我: 「Miss，我可唔可以攬吓你？」
輕輕一個擁抱之後，佢話: 「多謝你啊！無人叫過我發夢，叫我唔好發夢就有。」
果刻嘅感動好難表達，以為老土嘅一句，其實都係一個好大嘅鼓勵。
我已經無再教呢班，但佢哋都會成日搵我傾偈，而早幾個星期前，呢位女同學WhatsApp我，佢話打算之後進修creative media嘅範疇，佢再重提我俾佢嘅鼓勵。
我唔敢奢望45個學生都有得著，但一句鼓勵，一個擁抱可以推動到一個學生，我已經好心足
