“媽咪，點樣先可以令個腦袋唔好諗嘢？有時我真係唔想諗啲唔開心嘅嘢，不過停唔到嘅。”
芊芊係一個好鐘意動腦筋嘅小朋友，
佢成日會諗到好多”哲學”性問題，
例如:
我唔想到夜晚，因為即係一日嘅完結，咁你又會少咗日子見到我;
聖經話人係神創造出嚟，但進化論又話人係馬騮變出嚟，咁邊個先係真？
同佢一齊一日，佢會令你諗好多從來無諗過嘅問題，佢會問到你開始懷疑人生
佢其實好似我，有時會over thinking，諗得太多，導致個人會精神緊張。
所以由細到大佢睡眠質素都好差，
經常性半夜喊醒。
最近佢升小學，我最緊張嘅並非佢嘅成績，
而係佢嘅心理質素，佢嘅精神健康。
係香港做學生實在好有壓力，
有調查發現，有三成中小學生有自殺嘅風險。
所以我最著緊嘅，係要教識呢位 “over thinker”去放鬆。
“媽咪有時都會有呢個情況㗎，我會用一個叫54321嘅方法熄咗自己個腦㗎"
“好簡單，當你好緊張，或者個腦袋停唔到嘅時候....
用眼睛揾5樣你睇到嘅嘢;
用手揾4樣你摸到嘅嘢;
用耳朵揾3樣你聽到嘅聲;
用鼻哥揾2樣你聞到嘅味;
用條脷感受1樣你咀巴有嘅味道。”
