為咗令溫書氣氛輕鬆開心啲，我會帶家姐去唔同嘅café邊食邊溫。
溫緊countable/uncountable noun, 3-digit word problems, chemical energy同比喻法之時，
家姐問咗我幾個問題：
考試唔合格點算？
我病咗考唔到點算？(呢一點佢擔心咗一個月，細佬喺佢身旁打個乞嗤佢都彈開十呎)
又停課無得考點算？
又要zoom點算？
我盡力去解答晒佢以上嘅問題，
就喺呢個時候，教育局真係宣布停課。
從家姐嘅表情睇得出，佢真係好擔心，
唔止佢，作為家長聽到停課，諗到一家要WFH同時要兼顧小朋友一齊zoom，就覺得個頭好痛。
對上一年佢哋可以正常返學無停課無zoom，已經係兩年前嘅事。
呢兩年大家好努力去適應，唔好話小學/幼稚園學生，我入中學接觸嘅青少年，由於兩年無正常上堂，都有適應問題，身心健康都好需要關注。
望住眼前呢個無奈嘅小學生，我話，
「我哋盡力而為就得了。」
「盡力而為可能係考試唔合格，不過唔緊要，我哋一定會有辦法解決。」
「盡力而為，病咗嘅咪盡力瞓多幾覺快啲好返。」
「盡力而為，要zoom嘅媽咪陪你一齊上，準備零食俾你。」
「無論如何，媽咪一樣愛你，一樣支持你。」
我發覺有太多事情實在唔到我哋去控制，
唯有處理我可以控制到嘅事情。
我最著緊嘅，係佢哋嘅精神健康。
如果精神上/心理上唔健康，考得幾高分，入到邊間大學，做到咩工作都無用武之地。
要適應唔同教學模式/時間表/學習環境真係唔易，家姐本身已經係一個好緊張嘅人，係呢個時候，我只想陪伴住佢渡過每一個困難。
離開café 前，家姐話，
「媽咪，你係我最愛嘅老師。」
然後，我哋成個下午漫無目的咁喺街行，講吓笑話，睇吓街上嘅人同事，最後以一個甜品作終結。
「聽日考試有無信心？」瞓前我問。
「有，非常有，信我！」家姐好興奮咁表示。
夠啦，見到你輕鬆自信滿滿咁，無論發生咩事，我都覺得你可以處理到
