每次做親子講座，最受歡迎嘅題目類型通常係 「培養高動機孩子」、「如何提升學術能力」、「十大温習方法」，
無論主題名點改都好，內容都係萬變不離其宗，方法都係果一個。
今朝Ted Talk睇咗一個video，發覺內容同我平時講座講嘅好類似，所以好想分享一下☺️
做事自動自覺，充滿動機追求目標，帶著自信愛快樂積極態度面對人生？我相信每個家長都希望小朋友可以做到。
參考人本主義學派嘅心理學家Carl Rogers提出嘅教養方法，目的就係希望培養小朋友成為以上嘅人。
咁究竟有咩「神奇」妙法可以做到呢件事？
https://www.ted.com/talks/julie_lythcott_haims_how_to_raise_successful_kids_without_over_parenting
我知，聽落好老土，
又係講 「無條件嘅愛」。
點解「無條件嘅愛」咁重要
根據哈佛大學一個歷時75年嘅研究(The Grant Study)，人類嘅幸福/專業成功係源自對人嘅愛 - 朋友、家人、同事、同學、伴侶等等。
「愛」，係需要係童年時教小朋友，要學識愛人就要先學識愛自己。
而要學識愛自己，首先我哋要給予無條件嘅愛。
作為家長，我明白好難唔著緊考試測驗成績，
我都曾經經歷過(其實而家有時都會…)，每日放學就問: 今日考試點？默書呢？有冇做曬啲功課？上堂有冇留心？
太過集中注意力喺成績度，忽略咗佢想分享嘅趣事同八卦事情，就算佢哋分享，我都只係敷衍式應對。
後來我發覺，我唔希望仔女覺得我只關心佢哋嘅學業，而事實上，我關心嘅，我愛嘅，係佢哋整個人- 無論成績唔好，唔聽話，唔合作，好激心，好勞氣，甚至乎做啲我唔認同嘅行為，我都一樣咁愛佢。我相信呢個就係「無條件嘅愛」。
講就容易做就難，
尤其係當佢哋情緒失控，話唔鐘意你唔愛你嘅時候…..
點樣表達「無條件嘅愛」
説話方法
我記得大小姐三歲左右，脾氣好差，成日喊，激動之時仲會講: 哼！我唔鐘意你啊，我唔要你！
而我亦好想回一句: 我都唔鐘意你！
好彩大部分時間都截停到呢句，然後深呼吸一下講: 唔緊要，不過我一樣咁愛你。
當佢哋做啲唔合心意嘅事情，第一反應通常係責備。當然鬧唔一定係壞事，不過可以加一兩句説話俾佢哋知道，無論如何都唔會改變爸媽對你嘅感覺。
“你咁樣做咁樣講我好失望，不過，我一樣咁愛你。”
擁抱
最容易表達愛，但又成日都會遺忘咗嘅方法。
可能係自己嘅成長經歷影響，一直都唔係好習慣擁抱，亦唔太鍾意擁抱呢個感覺。
大小姐細個嘅時候，我曾經都以為自己成日攬佢，擁抱佢。
但細心回想，通常係佢瞓著咗抱佢，或者係行到攰想我抱果種有目的性嘅抱，
絕少無端端攬住佢，俾佢感受媽咪有幾愛佢。
於是由果時開始，我每日都會提自己攬吓佢，同佢講句，我好愛你㗎！
無條件嘅愛可以為小朋友建立自信同自我價值，利用呢個基礎，小朋友會有勇氣自由探索，作新嘗試，唔怕失敗。
