前幾日擺檔嘅時候，有個家長分享: 收工有時候都想同個仔傾計，不過好似揾唔到話題咁嘅。
有時候坐車無聊，或者瞓唔著，我會問兩個小朋友啲好無聊嘅問題，然後聽吓佢哋有趣嘅答案 (有時候會係氹到你暈嘅答案)。除咗可以了解吓佢哋之外，有時候佢哋嘅答案真係好意想不到，好有驚喜，例如....
我: 你有超能力變走一個人嘅話，變走細佬好無？
H: (激動到眼有淚光)梗係唔好啦！你好想無咗個仔咩？
(雖然平時會打打鬧鬧，口講唔理細佬，但其實好愛佢嘅)
除咗一般嘅對話外，我都好鐘意玩 “你寧願” (would you rather) 呢個遊戲，啲問題可以好搞笑:
你寧願無曬啲頭髮定無曬啲牙？
你寧願以後無得食薯條定雪糕？
你寧願食蛇定係蝸牛？
生日你寧願無禮物定收一份你唔鐘意嘅禮物？
你寧願要個好嘈但會同你玩嘅細佬，定係好安靜唔同你玩嘅細佬？
你寧願要長頸鹿條頸定係大笨象個鼻？
你寧願做媽咪/爸爸，定做小朋友？(芊芊話: 我唔做媽咪㗎，咁辛苦，你睇吓你幾辛苦)
你寧願頭頂中雀屎，定係無著鞋踩狗屎？
你寧願冬天食雪糕，定夏天飲熱水？
你寧願養好大食嘅貓，定好懶嘅狗？
對話確實係無 “養份” ，不過換嚟一陣子嘅歡笑都係幾好嘅親子對話。
*picture source: mindfulparentingcommunity
好書介紹
講起兄弟姊妹之間，好多時做大哥哥/大姐姐都會覺得弟妹好麻煩，好討厭，甚至想換走佢。
“The Swap” 呢本繪本嘅小主角正正就係有呢個念頭！！！！好想換走佢個麻煩細佬啊！！
