有多過一個小朋友嘅家庭，daddy mammy最頭痛嘅應該係......
成。日。鬧。交！
點解決？
“大嘅讓吓細啦!” “細嘅讓吓大啦!”
點都係會反枱收場喎！
講吓我家兩姊弟:
普遍感情非常好，不過都有鬧交爭玩具”我唔想見到你”“我要掉咗呢個細佬落垃圾桶” “我唔想做家姐” “你好煩”嘅時候。
不過轉頭就會有攬到實，久別重逢嘅畫面出現。
而細佬受罰時，最痛心嘅一定係家姐。
話說尋日lunch細佬發脾氣唔食嘢打瀉咗碗麵，
既然唔想食，我就收嘢。
我同佢解釋，你唔食就算了，不過無下午茶直到晚餐。
家姐好大反應: 吓！！細佬會好肚餓架！！！
相反當事人好平靜
然後我哋出街去逛逛。
經過麵包店，
細佬: 媽媽，餓啊，食包包。
我: 你好肚餓？因為你發脾氣唔食，無啦。你到夜晚先有飯食。
細佬知道自己錯，所以”哦”一聲答我。
家姐: (用佢急速緊張嘅聲線) 唔好啊！你做媽咪嘅大方啲啦，細佬係做錯咗，不過肚餓好慘架，你原諒佢啦！
然後跑去細佬身邊細細聲: 家姐今晚俾多啲飯你食，不過你要乖乖啦！
一路行，家姐繼續”教訓”我應該點做一個大方心地善良嘅媽媽。
過咗一陣，平時絶對唔會提出去食下午茶嘅家姐話:
“媽咪，我哋去揾個餐廳食下午茶啦！”
我: “好啊，你想食咩？”
家姐: “細佬有冇得食先？你大方啲啦blah blah blah blah....”
我: “啊，你係想細佬有得食？”
家姐: “細佬，我哋去食雪糕好無呢？定係食McDonald啊？”
結果... 家姐打救咗呢位奀皮仔
佢哋嘅互動令我諗起兩本講兄弟姊妹嘅繪本:
我想要弟弟變成貓
故事講述主角好討厭弟弟，因為佢太煩。有一日佢哋兩個俾爸爸罰企出門口，女主角好嬲，合埋眼心諗，如果弟弟變咗貓就好啦，又安靜又乖！結果佢睜開眼睛時，弟弟變咗隻貓啊！咁點算啊？主角居然覺得好後悔，好想要返個弟弟啊！！成唔成功？買本同哥哥姐姐一齊睇吓
真的不要了嗎？
“我討厭你！” “我想你消失！” 做爸媽應該都聽過。如果，呢個世界，真係有個人類垃圾桶，將你唔想要嘅人掉落去呢個垃圾桶，會點呢？雖然兄弟姊妹爸爸媽媽有煩嘅時候，但如果去左人類垃圾桶，你又會覺得點啊？ 買埋呢本同小朋友一齊研究下
Siblings: your only enemy that you can’t live without.
