“媽咪，angry同jealous有咩分別？”
聽到芊芊呢個問題，加上佢呢排好易發脾氣，我肯定佢一定係有啲issue未解決。
所以即刻放低手同佢温緊嘅中默，
準備上一堂情緒教育。
“嬲可以有好多原因，例如整爛咗玩具，得唔到自己想要嘅嘢等等。而妒忌通常係見到人哋有嘅嘢而自己又想有嘅果種感覺囉！”
“唔，其實呢，我有時係jealous細佬，但又唔知點講好，搞到好似好嬲要發脾氣咁囉，你知唔知啊媽咪？”
(明白曬，原來呢排咁情緒化係有原因)
“我知啊，因為我有時都會有妒忌呢種感覺㗎!靜靜雞話你知吖，媽咪曾經好妒忌一個人㗎，佢讀書好叻，又多朋友，老師又錫佢喎....”
“原來你都會㗎？咁點算好？”
我好慶幸芊芊可以將情緒同感受表達出嚟，我曾經睇過篇文章分享幾個方法解決小朋友妒忌嘅心情，當中有幾個方法我試過幾好:
1. 分享自己經驗 - 呢個做法好powerful，小朋友其實好鐘意聽大人嘅故事，我記得同芊芊講，媽咪會有妒忌人嘅時候...佢個樣話俾我知，佢係鬆咗一口氣。佢即刻覺得原來你都係同路人，你都明白我啊！當然，我會同佢一齊諗，有冇一個健康啲嘅方法處理呢個感覺呢？
2. 減少比較 - 道理上我明，不過執行上，有時都會失手。”你睇吓細佬，佢食得幾快！” “嗱，你睇吓細佬，佢搞掂啦！” 今次都係俾我一個好好嘅提醒，每一個人都係獨特，只要盡力做到最好嘅自己就足夠。
3. 提醒孩子佢獨有嘅優點 - 現代嘅小朋友都擁有好多技能，畫畫游水樂器跳舞，甚至騎馬歌劇武術。如果小朋友學術能力唔係好突出或者興趣上無特別嘅強項，就有機會會有妒忌嘅感覺。我會特別highlight芊芊性格上嘅優點，例如佢好有創意，成日諗到好多有趣嘅玩意同細佬玩。每次佢咁樣做嘅時候，我會將佢呢個優點放大，提醒佢有呢個天賦。
4. 獨處嘅時間 - 疫情之前，送咗芊芊返學，我會帶住細佬去玩，有獨處嘅時間。然後晏畫細佬午睡，就會同芊芊落去行吓。隨著工作忙碌加上疫情加上懶惰咗，我發覺好耐無同芊芊單獨相處傾偈。有一日我返工前同佢講，不如星期五下晏我哋兩個女仔出去行街食嘢吖！佢開心到每日都期待住星期五。而同佢出去果日 (其實只係坐車去商場逛吓食吓嘢)，從佢跳住行嘅步速就知道佢係好開心。我知道打從心底裏，芊芊其實好愛錫呢個細佬，不過佢覺得細佬又分享咗我嘅attention，所以會有妒忌。而呢啲獨處嘅時間正正就係好適合去reconnect。
當然，要處理情緒並非一時三刻就可以成功，我都需要不斷提醒自己要減少比較同keep住獨處時間呢個習慣。
