今日同小朋友講咗未啊？
講咩？就係講我愛你呀。
我相信做父母嘅，對仔女嘅愛都係無條件，甚至佢幾曳幾唔聽話幾搗蛋幾懶成績幾差幾百厭都好，爸媽都會一樣咁愛仔女。不過，有時太激氣就會衝口而出，講咗句:
“我唔要你啦！” 又或者鬥氣果時...
“你唔鐘意我啊嘛？我都唔係好鐘意你架咋！” 再唔係...
“你再唔聽話我趕你出門口！”
冷靜過後，係咪內疚到自己厘埋入廚房喊呢？
其實要無條件咁去愛，有時候都會有困難。
但偏偏，小朋友係好需要無條件嘅愛。
甚至乎同佢哋做事有無動機，會唔會自動自覺去做嘢係好有關係。
當然，表達愛嘅方法有一百萬種。
對小朋友嚟講，其中一個最有效嘅方法，當然係口講同身體接觸 - 多啲攬同錫啦。
除咗口講，我同芊芊有個習慣，會寫信俾對方。
夜晚佢瞓咗覺，我就會寫幾句說話俾佢，有時係讚佢做嘅事，有時係鼓勵說話(諗唔到我會去Brainy Quote揾句名人語錄)，有時係分享我工作嘅事。最重要係，每次都會話佢知”I love you”，寫完之後將封信擺係佢枕頭邊。
佢每次收到都會好開心，好認真咁睇完又睇，然後急不及待回信。
有時名人語錄佢睇唔明，會等pillow talk嘅時候一齊分享。
呢個方法除咗可以表達無條件嘅愛之外，亦係一個製造回憶嘅過程。
長大之後攞返啲信出嚟睇，應該有另一番滋味。
不過大家今晚開始寫一封信俾小朋友吖，唔需要好長，畫畫又得。我好肯定，小朋友收到爸媽寫嘅信，佢一定會開心過收到玩具！
*由於芊芊話信嘅內容係秘密所以需要打格仔
